Yardimli xeyriyye cemiyyetinin resmi sayti

TƏBRİK EDİRİK!

Admin — Sat, 04 Feb 2012 14:23:40 +0400

Azərbaycan Respublikası Daxili İşlər Nazirinin imzaladığı əmrə əsasən Suraxanı rayon Polis idarəsinin 30-cu Polis bölməsinin rəisi Fəqan Azadəliyev Yardımlı rayon Polis şöbəsinə rəis təyin olunub. "Yardımlı Xeyriyyə Cəmiyyəti" bu münasibətlə Fəqan müəllimi təbrik edir, yeni təyinatında ona can sağlığı, bol-bol uğurlar arzulayır. Xatırladaq ki, Fəqan Azadəliyev görkəmli alımımiz, geologiya-mineralogiya elmləri doktoru Cəbrayıl Əbdüləli oğlu Azadəliyevin oğludur.

GERİYƏ BAXMAĞA DƏYƏR...

Admin — Sat, 04 Feb 2012 14:08:53 +0400

Təsisçidən: Hər bir eldə təəssübkeşliyi ilə fərqlənən, yurd qeyrəti çəkən insanlar olub, bu gün də var. Həmin insanlar sanki doğulduğu yurdun, boya-başa çatdığı elin qeyrət qoruyucusu rolunu oynayırlar. Calayır Eyvazov, Damət Verdiyev, Balabəy Rzayev, Adi Babayev, Höccət Əkbərov, Əlisahib Babayev və s. bu kimi insanlar zaman-zaman rayonumuzun təəssübünü çəkiblər. Ötən əsrin axırlarında, daha doğrusu 80-90-cı illərində bu sıraya bir ad da əlavə olundu-Cavanşir Rəsulov. Bu gün təqaüddə olsa da Yardımlı camaatı onun rayon polis şöbəsində rəis müavini işlədiyi vaxtlarda necə el-oba qeyrəti çəkdiyi haqda hələ də danışır, təəssübkeş, qeyrətli bir eloğlu kimi şəninə xoş sözlər söyləyirlər. Bilmirəm nədəndir, etiraf edim ki, onu doğmalarım qədər əziz sanıram. Elə Calayır Eyvazovu, Damət Verdiyevi, Balabəy Rzayevi, Adi Babayevi, Höccət Əkbərovu, Əlisahib Babayevi də özümə mənəvi qardaşlarım bilirəm. Onların hər biri bu günümüzə örnək olacaq bir ömür yaşayıblar. Etiraf edək ki, zəmanəsinin qeyrətli oğulları kimi yaddaşlara həkk olunmuş bu kişilərin yeri bu gün də görünür...
Ötən həftə redaksiyamıza daxil olan bir yazı diqqətimi cəlb elədi. Cavanşir Rəsulovdan bəhs edən həmən yazını Sizə təqdim etməyi özümüzə borc bildik

Qısa arayış:

Onun atası mərhum Hüseyn müəllim məktəbimizin dil-ədəbiyyat müəllimi idi. Elə bil o da atasının yolunu davam etdirmək üçün dil-ədəbiyyat ixtisasını seçdi. Bir neçə il Ərsilə kənd səkkizillik məktəbində dil-ədəbiyyat müəllimi işlədi də. Elə fəal, bacarıqlı müəllim olduğu üçün də 1974-cü ildə milis sistemində işləməyə dəvət etdilər, o da buna qərar verdi. Rəis müavini vəzifəsinə qədər şərəfli və məsuliyyətli bir ömür yolu keçdi. Bir kənd səviyyəsində tanınan Cavnşir müəllim qısa müddət ərzində rayon və hətta qonşu rayonlar səviyyəsində tanındı. İndi o Sumqayıt şəhərində yaşasa da, Yardımlı onu, o isə Yardımlını unutmur. İşlədiyi uzun illər qazandığı el-oba məhəbbəti ona ömrünün axırına kimi yol-yoldaşı olacaq...
Cavanşir Rəsulovu tanıyırsanmı?-sualına Yardımlıda yox cavabı almaq nə qədər çətindirsə, onun haqqında mənfi fikir eşitmək də bir o qədər çətindir. Mən bu insanın mərdliyi, yurd təəssübkeşliyi, qeyrətli olduğu haqqında hələ orta məktəbdə oxuduğum vaxtlar böyüklərin, ağsaqqalların dilindən çox eşitmişdim. Sonralar bu söhbətlərin heç də elə belə, söz xatirinə söylənilmədiyinin özüm şahidi olmuşam. Sovet imperiyasının at oynatdığı illərdə dövlətin nümunəvi məmuru olmaqla yanaşı, məhz xalqın da sevimlisinə çevrilən bir məmur olmaq çox çətin idi. Bu da, istər hakimiyyət orqanlarında olan qeyri sağlam qüvvələr tərəfindən, istərsə də xalq arasında birmənalı qarşılanmırdı və bəzən buna qısqanclıqla yanaşanlar da olurdu. Bütün bunlara baxmayaraq Cavanşir müəllim heç vaxt özünü dəyişmədi və işlədiyi çətin, məsuliyyətli və şərəfli vəzifəsində həmişə yaxşılıq etməyi özünə bayraq etdi. O bayraq bu gün də Yardımlıda dalğalanmaqdadır.

Cavanşir müəllim 5-10 manat gəlirindən ötəri vicdanını satan �yoldaşlarına� qarşı da həmişə mübarizə aparar, onları bəzən gizli, bəzən də açıq-aşkar cəzalandırmaqdan belə çəkinməzdi. O, işlədiyi müddətdə dövlətin yazılı qanunları ilə yanaşı, rayonun milli mentalitetinə uyğun, yazılmamış qanunlarına da üstünlük verər və hamıya bu qanunlara riayət etməyi aşılayardı. Solomonun belə bir fikri var:�Kim öz iradəsinə hakimlik edə bilirsə o, böyük bir əyaləti idarə etməkdən də yüksək vəzifəyə layiqdir�. Bəli, Cavanşir müəllim öz iradəsinə hakimlik etməyi bacaran bir polis zabiti idi. Xırda narazılıqdan şikayətə gələn hər kəsi öz psixologiyasına uyğun başa salar, belə şikayətlərin heç vaxt rayon səviyyəsinə çıxmağına imkan verməzdi. Məhz belə xüsusiyyətlərinə görə və hər bir insana peşəkar həssaslığı ilə yanaşması onun xalq arasında qazandığı hörmətini daha da artırırdı. Kəndin xeyir-şərində maddi və mənəvi köməklik göstərərdi və hal-hazırda da bunu davam etdirir. Polis mundirində, zahirən nə qədər sərt görünsəydi də, onunla həmsöhbət olanda bir o qədər kövrək qəlbli bir insan olduğunun şahidi olardın. Bir neçə onilliklər ötüb keçsə də, o vaxtlar milis orqanlarında müxtəlif vəzifələrdə işləmiş mərhum Əlisahib Babayev və mərhum İsmayıl Dadaşovla yanaşı Cavanşir müəllimin də haqqında Yardımlı camaatı bu gün də ağızdolusu danışır. Mənə elə gəlir ki Cavanşir müəllim üçün bundan böyük fəxarət ola bilməz, ən önəmlisi odur ki, ona bu hörməti qazandıran onun vəzifəsi yox, şəxsiyyət olmasıdır. Bütün bunlarla yanaşı o, 1990-cı illərdə Respublikada gedən siyasi qalmaqaldan Yardımlıda istifadə etmək istəyənlərə qarşı da barışmaz mövqe tutdu. Rayonun iqtisadi-siyasi sisteminin təhlükəsizliyi, insanların həyatı və mülkiyyət hüquqları əleyhinə yönəldilən mütəşəkkil cinayətkar dəstələrə, qanunsuz silahlı birləşmələrə qarşı o, öz bilik və bacarığından məharətlə istifadə edə bildi. Nəticə etibarı ilə Yardımlıda həmin illər insanlar arasında siyasi qarşıdurmalar yaratmaq istəyən qüvvələrin məkrli niyyətləri arzu olaraq ürəklərində qaldı.
Bir neçə il bundan qabaq təqaüdə çıxan Cavanşir müəllim hal-hazırda Sumqayıt şəhərində ömrünün 64-cü qışını yaşayır. Biz ona uzun ömür, can sağlığı arzulayırıq. Geriyə baxmağa dəyər, Cavanşir müəllim!

İdris Babayev,
Telavar kəndi

GEC OLAR, GÜC OLAR...

Admin — Fri, 03 Feb 2012 23:14:45 +0400

(Proje)
Atrıq bir il idi ki, Çimnaz xalayla üz-üzə gəlməkdən çəkinirdim, bu müddət ərzində məni bir neçə dəfə soraqlasa da gözünə görünməyə utanırdım...
Beş il bundan öncə onun düşdüyü durumu bir iş yoldaşımdan eşidib ona yardımçı olmağa tələsmişdim. Avtomobil qəzası nəticəsində oğlunu, uşaq evində böyümüş gəlinini itirəndən sonra, onlardan yadigar qalmış iki azyaşlı uşağa həm ana, həm də ata olmuşdu, altmış beş yaşlı Çimnaz xala. Ömrü boyu heç yerdə işləməyən, ərini xeyli müddət bundan qabaq itirmiş, acınacaqlı vəziyyətdə yaşayan Çimnaz xalanın çəkdiyi məşəqqətlərə hər adam tab gətirə bilməzdi. Onun çətinliklərini nəzərə alıb bir il bundan öncəyədək dörd ildən bir az da çox müddətdə, hər ay əlli manat pul verirdim ona. Bu da özünün dediyinə görə, onun üçün çox böyük kömək idi. İşdən çıxarıldıqdan sonra bir neçə ay davam etdirə bilsəm də, artıq bir il idi ki, imkanım buna yol vermirdi...
...O gün yaşadığım evin blokundan həyətə çıxıb, binadan təzəcə uzaqlaşmışdım ki, Çimnaz xalayla üz-üzə gəldim. Deyəsən, yaxınlıqda olan polikilinikadan gəlirdi. Məni görən kimi boynumu qucaqlayıb, övladı hərbi xidmətdən gələn ana kimi üzümdən öpdü və utandığımı görüb:-Utanma oğul, verən əl utanmaz. Niyə belə xəbərsiz qeybə çəkildin?-deyə sual verdi. Susdum. -Bilirəm, hər şeydən xəbərim var, səni işdən çıxarıblar-:dedi. Uşaqları soruşdum, böyüyürlər, böyüdükcə də problemləri də böyüyür, söylədi...
Nə isə... Biri-birimizə xeyli ürək-dirək verib, ayrıldıq. Ayrılanda Çimnaz xalanın bəlkə də özü də bilmədən söylədiyi tükürpədici sözlər hələ də qulaqlarımda cingildəyir: Darıxma oğul, gec olar, güc olar. Sən iki yetimə əl tuturdun, görüm, yetimlərimin çörəyinə bais olanın balaları çörəyə möhtac qalsın!..

Elsevən

İÇİNİN AZADLIĞINI QORUYAN POLKOVNİKİN HEKAYƏTİ...

Admin — Tue, 31 Jan 2012 02:52:34 +0400

Redaksiyadan: Şamil Seyidli rayonumuzda işlədiyi müddətdə çoxsaylı uğurlu əməliyyatlara imza atıb. Onun başçılığı ilə narkoticarətə və narkomaniyaya qarşı sərt mübarizə aparılıb və uğurlu nəticələr əldə edilib. Onun sayəsində rayonda polisə qarşı münasibət kökündən dəyişib. Yardımlı polisi bu gün rayonun ən etibarlı qurumuna çevrilib. Şamil Seyidli Yardımlıda yeganə polis rəisi olub ki, o, həm də əhalinin sevgisini, rəğbətini qazana bilmişdi. Təsadüfi deyil ki, 2010-cu ildə rayonun ictimaiyyətinə göstərdiyi doğma münasibətə, respublikamızın digər bölgələrində yaşayan Yardımlı əsilli soydaşlarımız arasında qazandığı nüfuza və narkomaniyaya qarşı apardığı barışmaz mübarizəyə görə �Yardımlıların əsl dostu� nominasiyasına layiq görülüb. Bundan əvvəl isə o, �Yardımlı Xeyriyyə Cəmiyyəti�nin keçirdiyi sorğuya əsasən 2008-ci ildə �İlin ən nümunəvi məmuru� nominasiyasına layiq görülmüşdü. Elə Yardımlı əsilli ictimaiyyət arasında qazandığı nüfuza görə də �Yardımlı Xeyriyyə Cəmiyyəti� 2010-cu ildə görkəmli yurddaşlarımızın iştirakı ilə Şamil müəllimin 50 illik yubileyini təntənəli şəkildə qeyd edib. Bir sözlə, o, yardımlıların ürəyində yurd sala bildiyi üçün hələ uzun müddət nümunəvi polis rəisi kimi yaddaşlarda qalacaq. Necə deyərlər, o, Yardımlıya kişi kimi gəldi, kişi kimi işlədi, kişi kimi də getdi...
Qeyd edək ki, indiyə qədər Yardımlı Rayon Polis Şöbəsinin rəisi vəzifəsində işləmiş şəxslər heç vaxt yuxarı vəzifələrə təyin olunmayıblar. Şamil Seyidli ilk rəisdir ki, daha böyük rayona polis rəisi təyin olunub.
Allah ona yar olsun!

2009-cu il yanvar, professor Mircəfər Həsənli "İlin ən nümunəvi məmuru" nominasiyasını təltif edir.

Onun polis olmağını ailəsi heç düşünməyib. Bu İSTƏK o təbəqənin arzusu deyildi... Polis olmaq onun uşaqlıq arzularının siyahısında da yox idi... O, POLİS POLKOVNİKİ OLDU. Polis işləmək onunçün fürsət deyil, ALLAHIN ona verdiyi ŞANS fürsətdi. Polis mundiri ona rəğbət qazandıran, yanmışlıq verdiyinə gözdağı çəkdirən, getdiyi yerdə vahimə yaradan LİBAS deyil, o libas onun üçün sadəcə UNİFORMADIR...
O, polis rəisidir, amma zəhmindən tük ürpənmir, heç səsinin tonu da bağırçatdadan deyil... O, kresloya yaxılmır, kreslo ona çımxırmaq üçün söykənəcək də deyil... Kreslo sözünün kəsəri olmaq üçün ona oturacaq yeridi. Keçmişində polis forması geyən kimsəsi olmayıb. O FORMA dədə-baba ocaqlarının divarında evin dəyərini göstərən matah şeylər kimi nə xalçanın üstündən asılmayıb, nə də qəlib paltar sabunuyla yuyulub çəpər üstünə sərilməyib ki, qonşu-bacaya evin kişisinin ZOR SAHİBİ olduğunu qandırsın... O, formanın çəpər-çoluğa dırmanan, bağ-bostana göz verib, işıq verməyən kənd uşaqlarının zəhrini yarmağının çox ŞAHİDİ olub... Onun uşaqlığı da o formanın zəhmni görüb. O qorxunu canı çəkdiyindən CANLARDAKI QORXUNUN dəyərini bilib və o, həmin formanın qara-qorxusunu sındırmaq istəyib. Ağzıgöyçəklər ona �göyçək� ağızlarını büzüb: �Sən müəllimlik eləyirsən�,- deyib irad tutublar. O, AĞILLI BAŞLARIN hesabında İSƏ ƏSİL İNSANDIR...

2010-cu ilin aprel ayı, Şamil Seyidlinin 50 illik yubileyi münasibəti ilə Millət Vəkili, professor Fəzail İbrahimli "Yardımlı Xeyriyyə Cəmiyyəti"nin qiymətli hədiyyəsini ona təqdim edir.

TƏQDİMATIN ÖZÜ

Şamil Seyidli Naxçıvanda doğulsa da bütövlükdə Azərbaycanı sevir. Onunçün VƏTƏN doğulduğumuz, xeyrin-bəhrin gördüyümüz, oğul-uşağa pay-puş elədiyimiz, üstündə BAŞI SƏRKİLİ GƏZDİYİMİZ torpaqlar deyil, Onunçün VƏTƏN üstündə qan tökdüyümüz ƏSİR TORPAQLARIMIZDI...
Kasıbçılığın qara üzü onun uşaqlığının köhnə TANIŞIDI... O da tələbəçilikdə kartofla keçinib, yeyimcil kənd kişilərinin para tkəsi olan bulkuyla, yarım stəkan siropla tələbəçiliyin uzun gününü yola da verib, onun da ayaqqabıları su verən yerlərindən payızın sısqa yağışını içinə çəkib, o da təri dabanından çıxana qədər qara fəhləçilik edib. O vaxtlar əyinlərin yırtıb əskiyə döndərdyi sifarişli kostyumu onun əyni Tayqada tələbə-inşaat dəstəsində əlinin daş kimi qabarı ilə qazandığı pulla görüb, o kostyumu şəhərin ən ucuz dərzisinə tikdirib həm də... O, QİSASÇI OLMADI; nə MİLLƏTƏ, nə İNSANA, nə də ki, üzümüzü sürtdüyümüz TORPAĞA... Çəkdikləri karına gəldi: İNSANA DƏYƏR VERMƏK ÜÇÜN, İNSANLIĞI ANLAMAQ ÜÇÜN, HAQQI NAHAQDAN SEÇMƏK ÜÇÜN...
�İnsanlar var ki, onlar ALLAHI yada salırlar�,- Onunla söhbətləşəndə Peyğəmbərin bu hədisini mənə aid etdi. Mən tərsini gördüm... Hədis daha çox ona aid idi. O HAQQ onun idi. Mən, ALLAHIN titulsuz, rütbəsiz quluyam, o isə SEYİD OCAĞINDA doğulub. O OCAĞA ov gəlirmiş, insanların hənirindən qaçan çölün ov heyvanları gəlib O OCAQDA su içib gedirmiş...
Şamil müəllimin təbiətindəki DOĞRULUQ, DÜRÜSTLÜK, SÖZ CƏSARƏTİ ona O OCAQDAN VƏRƏSƏDİ. Atası Mirəziz ağa kiçik bir işin yiyəsi imiş, HAQQ isə Onun üçün çox BÖYÜK olub. Mənfəətinə başqasının haqqını satmayıb, harama baş əyməyib. Şamil müəllim OCAQLARININ ƏDALƏTİNİ görüb. O OCAQDA haqqa ETİQAD olub, başqasının haqqı əziz tutulub. Atası kimi anasının da gözü öz tabağında olub, sıxıntının içində də ALLAHINA güvənib. Yaman günün ömrünün az olmağına İNAMI olduğundan dar gündə özünü TOX APARIB... Bu ocağın övladı Şamil də özünün və ailəsinin haqqını heç kəsə satmayıb. Tay-tuşlarının tələbəçiliyin forsunu verdiyi vaxtda o, atasına edilmiş haqsızlığa qarşı tək-tənha döyüşüb:

1-ci haşiyə

Atası sənətinin ustası olub, kolxozda mexanniki işləyirdi. İşin başdan aşan vaxtında Mirəziz ağa ehtiyat hissəsinin dalıyca gedir. Tərslikdən rayonun- Şərurun birinci katibi ora gəlir. Qışqırır ki, hanı mexannik?! Sədr qorxudan özünü itirir, sözün düzünü deyə bilmir. Birinci katibin tapşırığı ilə Mirəziz ağanı işdən çıxardırlar. Onda Şamil müəllim Neft və Kimya institutunun ikinci kursunda oxuyurdu, on doqquz yaşı var idi. Atasının haqsız yerə işdən çıxarılması şəninə toxunur. Tələbə Şamil L.İ.Brejnev, SSRİ-nin Baş Prokroru Rudenko və Azərbaycan MK-nın birinci katibi H.Əliyevə ərizə yazır. Məktubların cavabları gəlir. Onu rayonun birinci katibinin yanına aparıplar. O da qorxmadan haqqı tapdalanan atasını müdafiə edir... Və cəsarəti birinci katibin xoşuna gəlir...
CƏSARƏTİ Onun hər yerdə karına gəlib və İÇİNİN AZADLIĞINI heç vaxt itirməyib...

2-ci haşiyə

Şamil müəllim institutdan sonra Şərur rayonunda �Təmir-tikinti istehsalat birliyi�nin komsomol təşkilat katibi işləyirmiş. Birliyin direktoru da kəndsayağı desək �qoyma ağıl� adam imiş, onun-bunun sözü ilə oturub-dururmuş. Şamil müəllim divar qəzeti buraxır. Keçəl baş çəkdirir, dörd misradan ibarət şeir də yazır:

Mal var başqasınındır,
Qoç var başqasınındır.
İdarədə o kimdir,
Başı başqasınındır?

Altından da yazır ki, yozması bizdən, açması sizdən. İdarədə kimsə qəzetin küncünə yazır ki, müdir. Aləm qarışıb, məssəb itir və onun cəsarətinin arxası YERƏ DƏYMİR...
Millətlərin min illərlə arzuladığı ƏDALƏT və AZADLIQ Şamil Seyidlinin İÇİNDƏDİ... �İmkanlılar gedib, Kişilər ölüb, məzlumlar qalıb. Qalanların deyə bilmədiyini mən deyirəm�,- deyə bilən də ODUR. Onun içində əminlik var ki, ALLAH haqqı deyənləri qoruyur və o, ONA arxayındı. O, başının üstündəki PORTRETƏ və QANUNLARA ehtiramlıdı. Onun EHTİRAMINDA işinə kara gələn SAXTALIQ yoxdu. O, haqsızın dostu deyil, o, MİLLƏTİ sıxıb rahatçılığını da təmin etmir. O, içindəki AZADLIĞI qorumağı bacarır. Onun İÇİNDƏ öz dünyası var. Orada ƏMİN-AMANLIQDI. İçi rahatdı. O, qəlbini TƏMİZ SAXLAYANLARDANDIR...

3-cü haşiyə

Polis təcridxanasına düşən birisi Şamil müəllimdən xahiş edir ki, namaz vaxtlarını bilmək üçün ona saat versinlər. Şamil müəllim öz qol saatını açıb ona verir...

2011-ci il yanvar, Xalq Şairi, Millət Vəkili Sabir Rüstəmxanlı "Yardımlı Xeyriyyə Cəmiyyəti"nin təsis etdiyi "Yardımlıların əsl dostu" nominasiyasını Şamil Seyidlinin nümayəndəsinə təqdim edir.

SÖZ SÖZÜ ÇƏKƏR

�Aləmlərə sığmayan MƏN sizin qəlblərinizə sığdım. Sizin qəlbləriniz mənim EVİMDİ. Evimi TƏMİZ SAXLAYIN�,- bu, UCA ALLAHIN bəyanıdı.
O, özündən ÇOX NARAZIDI. Hələ də BÖYÜK MƏQAMA yetişə bilmir... Sufilərə görə dünya üç hissəyə bölünür. Kolu-kosu, qanqalı, şərri gözümüzə girən, qeybətini, yalanını, nahaqqını qulaqlarımızın eşitdiyi DÜNYA, İnsanlığın ALİ MƏQAMI olan DÜNYA və ƏMƏLLƏRİMİZİN cavabını verəcəyimiz AXİRƏT. Hamımız doğuluruq və ölürük. Yunis İmrə düz deyirdi ki, ana bətnindən gəldik bazara, bir kəfən alıb dönək məzara...
Şamil müəllim üçün DÜNYA DAR deyil. O, əlli yaşında da anası üçün yana-yana ağlayır, yaddan çıxmışları yada salmağı bacarır, dostlarının xeyir-şərinə birinci o yetişir, dünyanın ailə səadətində gözü qalan subay tələbə yoldaşına ad günü keçirir, sıravi polislərlə futbol oynamağı özünə ar bilmir, şəxsiyyət vəsiqəsini dəyişməyə gəlmiş imkansızın cibinə pul qoyub yola salır, dostu Çingizin dörd il uşaq həsrəti çəkən gəlin qızının ana olacağını o, yuxusunda GÖRÜR, polis rəisi işlədiyi Yardımlının kasıb-kusubunu, əlsiz-ayaqsızını, dilsiz-ağızsızını o, ÖZ DOĞMASI bilir, oğlunun institutunu Bakıdan Naxçıvana dəyişir ki, kökünü unutmasın, ŞƏRƏF və DOSTU bildiyi AİLƏSİNİ doğru yola-ALLAHIN YOLUNA O vadar edir, İMANLI qadınına, ƏDALƏTLİ hakim olmaq istəyən oğluna, OCAĞININ ƏXLAQINA yaraşan qızına o, kürəyini SÖYKƏYİR, Məqamı ALLAHIN yanında olan SÖZÜN DƏYƏRİNİ də bilir. Bəlkə də ona görədir ki, şeir yazmağı da var... O, Şərur yallısını duyub oynayır. Dostu Çingiz müəllim deyir ki, Şamilin qarmonda çaldığı �Vağzalı�sını eşitməyə qulaq, duymağa insan lazımdı. Onun heç kimə, heç dostlarına da açmadığını qəlbi və barmaqları danışır...
O, futbolu da çox sevir, həm də boksçu olub.
Şamil müəllimə haqsızlıq edənin nə günə düşdüyünü çoxları ÇOX GÖRÜB. Görənlər deyirlər ki, onun qəlbi təmizdi, ona sataşan zərər çəkir...
O da bütün insanlar kimi səhv və içinə uyğun olmayan hərəkətlər edib, ancaq altını da çəkib, peşiman da olub. Özünü isə heç ALDATMAYIB. Pisini pis GÖRÜB...
ALLAHIN sevmədiyi YALANLARDAN və YALANÇILARDAN Şamil Seyidli də heç XOŞLANMIR...

P.S. ALLAHIM, SƏNDƏN çox razıyam. Şeytana fürsət vermədin ki, azdırıb SƏNİN sevmədiyin YALANI yazım...

Şükür Səlimxanlı

"Yardımlı Xeyriyyə Cəmiyyəti"nin çəkdiyi sənədli filmlər

Admin — Thu, 21 Apr 2011 18:20:28 +0500

"Millətin Vəlisi"
Unudulmaz ictimai-siyasi xadim Vəli Məmmədova həsr olunur

"Odlu həyat" SƏNƏDLİ FİLMİ

Admin — Thu, 21 Apr 2011 18:19:52 +0500

Kimyaçı alim, bacarıqlı istehsalat rəhbəri Nərçə Ağayevə həsr olunur

SAYTIN BU ŞƏHİFƏSİ "YARDIMLININ SƏSİ" QƏZETİNƏ MƏXSUSDUR

Admin — Tue, 01 Mar 2011 08:22:56 +0400

Səhifədən material götürüb müxtəlif mətbu orqanlarında istifadə etmək istəyən soydaşlarımızdan xahiş edirik ki, "Yardımlının Səsi" qəzetinə istinad eləsinlər.

Əlaqə

Admin — Mon, 05 Jul 2010 14:27:40 +0500

"Yardımlı Xeyriyyə Cəmiyyəti" İctimai Birliyi

Admin — Sat, 03 Jul 2010 00:39:58 +0500

Yardımlı Xeyriyyə Cəmiyyəti İctimai Birliyinin əsas məqsəd və vəzifələri:

-Azərbaycan Respublikasının müxtəlif ərazilərində yaşayan yardımlıların diqqətini Yardımlının daha da abadlaşmasına, imkansız yurddaşlarının sosial və digər problemlərinin həllinə cəlb etmək;
-İmkansız və məhdud imkanlıların təhsil, müalicə və digər problemlərinin həllinə yardım,
-İstedadlı gənclərin istedadlarını nümayiş etdirməkdən ötrü sərgilərin, müsabiqələrin keçirilməsinə maddi və mənəvi dəstək,
-Perespektivli idmançıların Ölkə və Beynəlxalq yarışlarda iştirakına dəstək,
-Yardımlının tarixi abidələrinin, yerli adət-ənənələrinin elmi şəkildə öyrənilməsi və təbliği,
-Bölgədə yaşayan gənclərin hüquqi marifləndirilməsi,
-Bölgədə iqtisadi, sosial, ekaloji problemlərin həlli üçün elmi tövsiyələr hazırlamaq,
-Bölgədə narkomaniyaya qarşı mübarizədə idealoji işlərin aparılması,
-Azərbaycan Respublikası qanunvericiliyi ilə qadağan olunmayan digər fəaliyyət növləri.

Cəmiyyətin elektron ünvanı: tekdam@mail.ru

Cəmiyyətin sədri ilə 050-336.12.68 nömrəli telefona zəng vurmaqla əlaqə saxlaya bilərsiniz.

Cəmiyyətin Yardımlı rayonu üzrə koordinatoru: Ramiz İsmayılov

Cəmiyyətin Bakı şəhəri üzrə koordinatoru: Fuad Bədirov

Cəmiyyətin Sumqayıt şəhəri üzrə koordinatoru: Hilal Əliyev

"YARDIMLI XEYRİYYƏ CƏMİYYƏTİ"NİN VƏ "YARDIMLININ SƏSİ! QƏZETİNİN FƏALİYYƏTİNƏ DƏSTƏK OLMAQ İSTƏYƏN XARİCDƏ YAŞAYAN YURDDAŞLARIMIZ AŞAĞIDAKI HESABA PUL KÖÇÜRƏ BİLƏRLƏR

(DOLLARLA)

Beneficiary s Bank

TECHNIKABANK OJSC, Sumgait Branch
BAKU, AZERBAIJAN
SW:FT: 36882623

Beneficiary MUSTAFAYEV ELMAN ELDAR OGLU
Account � 3811 00 4146 0001 USD

Azərbaycan Respublikasının ərazisindən isə bu hesaba pul köçürmək mümkündür:

Bankın adı: �Texnikabank� ASC Sumqayıt filialı
Kod: 508795
VÖEN: 9900000681
Müxbir hesab: 0137010031944
SWIFT BIK: TECİAZ 22

ADI: Yardımlı Xeyriyyə Cəmiyyəti İB

Hesab: 33080041560001

VÖEN: 2901678291

Yardımlının səsi qəzeti

Admin — Wed, 30 Jun 2010 11:53:33 +0500

�Yardımlı Xeyriyyə Cəmiyyəti� İctimai Birliyinin İdarə Heyyətinin üzvləri:

Elman Eldaroğlu - Sədr, şair-publisist
----------------------------------------------------------------------------
Telman Vəlixanlı - Filologiya elmləri doktoru, professor
----------------------------------------------------------------------------
İlham Əhədov - Texnika elmləri namizədi
----------------------------------------------------------------------------
Fərhad Mirzəyev - Texnika elmlər namizədi
----------------------------------------------------------------------------
Malik Əkbərov - İqtisad elmlər namizədi
----------------------------------------------------------------------------
Misirxan Talıbov - Texnika elmlər namizədi
----------------------------------------------------------------------------
Səfər Kəlbixanlı - Filologiya elmlər namizədi
----------------------------------------------------------------------------
Əlövsət Əliyev - Hüquqşünas
----------------------------------------------------------------------------
Mərdan Qəniyev - Sahibkar
----------------------------------------------------------------------------
Hacı Himayət Mahmudov - Həkim
----------------------------------------------------------------------------
Firuddin Əkbərov - Sahibkar
----------------------------------------------------------------------------
Sahib Əliyev - FSahibkar
----------------------------------------------------------------------------
Cəmiyyətin əlaqə telefonu-050-336.12.68
----------------------------------------------------------------------------
Elektron poçt unvanı:tekdam@mail.ru
----------------------------------------------------------------------------

Təftiş komissiyası

Elçin Zahiroğlu, Afər Ağayev, Qabil Dadaşov.